नवदिल्ली - सुदृढेन शक्तेन च राष्ट्रेणाद्य स्वीयः द्विषष्टितमगणतन्त्रदिवसः आयोजितः। अस्मिन्नवसरे राजपथे आयोजिते कार्यक्रमे विविधक्षेत्रेषु राष्ट्रस्य उपलब्धयः प्रदर्शिताः। अत्र सैन्यबलं, वैज्ञानिकप्रगतिः च अभिल्क्ष्य तेजस् नामकं तद्देशीयरणविमानं, ध्रुव् नामकमुदग्रविमानं, अन्याः च प्रदर्शिताः सन्ति। समारोहस्य प्रारम्भे प्रधानमन्त्रिणा डो. मनमोहनसिंहेन अमरजवानज्योतिस्थले हुतात्मनां स्मृतौ श्रद्धाञ्जलिरर्पितः।